Þær eru orðnar háværari, raddirnar þess efnis að sóknarmaðurinn Luis Suarez, gæti gengið til liðs við fyrrum liðsfélaga sinn, Steven Gerrard hjá Aston Villa.
Talið er að Suarez sé hrifinn af þeirri hugmynd að reyna fyrir sér á ný í ensku úrvalsdeildinni þar sem hann sló í gegn á sínum tíma sem liðsfélagi Gerrards hjá Liverpool.
Suarez hefur ekki verið í því hlutverki sem hann er vanur hjá Atlético Madrid undanfarið, hann hefur verið meira á bekknum og virðist lítast ágætlega á það að skipta um umhverfi.
Aston Villa hefur farið vel af stað undir stjórn Gerrards sem tók við liðinu á síðari mánuðum ársins 2021. Þá hefur liðið bætt við sig stórum bitum í félagsskiptagluggunum en Philipe Coutinho og Lucas Digne hafa gengið til liðs við félagið.
Aston Villa gæti fengið Suarez fyrir lítinn pening núna strax í janúar eða beðið þangað til að samningur hans við Atlético Madrid rennur út í sumar og reynt að fá hann þá á frjálsri sölu.
Spænski blaðamaðurinn Gerard Romero greinir frá því að Gerrard hafi átt samtal við Suarez um möguleg vistaskipti hans. Þá greinir hann einnnig frá því að Suarez hafi fengið tilboð frá félögum í Brasilíu og Sádi-Arabíu en að þeim tilboðum hafi verið hafnað.