Pierre-Emerick Aubameyang, neitar því að hafa verið rekinn aftur til Arsenal úr landsliði Gabon vegna agabrots. Hinn 32 ára gamli framherji er að glíma við hjartavandamál og því var talið best að hann myndi snúa aftur til Norður-Lundúna.
Aubameyang hafði áður greinst með Covid-19 en hafði síðan þá mætt aftur til æfinga með landsliði Gabon sem keppir í Afríkukeppninni.
Í færslu á samfélagsmiðlinum Twitter í gær sagðist Aubameyang ekki ætla að tala um falsfréttir sem væru á kreiki um hann.
,,Við erum að glíma við vandamál sem erfitt er að leysa af sjálfu sér, svo bætast við slúðursögur ofan á það. Við þurfum fyrst og fremst að hugsa um heilsu okkar. Ég ætla ekki að tala um þessar falsfréttir en vonast til að landsliðokkar ná eins langt og hægt er í Afríkukeppninni,“ skrifaði Aubameyang á Twitter.
Aubameyang snýr nú aftur til Arsenal þar sem hann er í þröngri stöðu. Undir lok síðasta árs var fyrirliðabandið tekið af honum þar í kjölfar agabrots og síðan þá hefur hann ekki spilað leik fyrir liðið.