Að minnsta kosti þrír leikmenn íslenska landsliðsins í knattspyrnu og tveir úr starfsliði hópsins greindust smitaðir af COVID-19 við heimkomu í gær. Þetta staðfestir Ómar Smárason fjölmiðlafulltrúi KSÍ við 433.is og eru þeir aðilar farnir í einangrun.
Liðið hafði dvalið í Tyrklandi í rúma viku þar sem liðið lék æfingaleiki gegn Úganda og Suður-Kóreu. Liðið gerði jafntefli við Úganda en tapaði gegn Suður-Kóreu í Belek.
Íslenska liðið kom heim í gær og fóru allir í sýnatöku við heimkomu. Í dag hefur svo nokkur fjöldi jákvæðra sýna komið í ljós.
Ómar Smárason sagði að nú væri nokkur fjöldi kominn í sóttkví vegna þessara smita en smitrakingu er þó ekki lokið að fullu.
Brynjólfur Willumsson greindist smitaður í Tyrklandi og var í einangrun nánast allan tímann sem liðið var í verkefninu.