Manchester United er í þjálfaraleit en Ralf Rangnick tók við félaginu til bráðabirgða út tímabilið en verður svo ráðgjafi hjá félaginu næstu tvö ár.

Þó nokkur nöfn hafa verið nefnd en Corriere Dello Sport segir að enska félagið hafi nú áhuga á Simone Inzaghi, þjálfara Inter Milan.

Inzaghi tók við Ítalíumeisturum Inter í sumar og hefur byrjað vel en liðið er á toppi deildarinnar. Ralf Rangnick ku vera afar hrifinn af Inzaghi og hefur hvatt stjórn Manchester United til þess að skoða að fá hann til starfa.

Simone Inzaghi er sagður vera afar spenntur fyrir því að þjálfa utan Ítalíu og er byrjaður á enskunámskeiði í heimalandinu.

Enska stórliðið er þó ekki eina félagið sem vill fá Inzaghi til starfa en Atletico Madrid vill sjá hann taka við stjórnartaumunum þar á næstu árum.