Liverpool tók á móti Arsenal í fyrri leik liðanna í enska deildabikarnum í gær. Það markverðasta sem gerðist í fyrri hálfleik var þegar Granit Xhaka, miðjumaður Arsenal, braut á Diogo Jota á 24. mínútu. Portúgalinn var sloppinn í gegn og fékk Xhaka því beint rautt spjald.

Markalaust var í hálfleik. Þrátt fyrir að vera manni fleiri tókst Liverpool lítið að ógna þéttu og skipulögðu liði Arsenal í seinni hálfleik. Það voru svo gestirnir sem fengu fyrsta góða færi leiksins þegar Bukayo Saka var kominn einn gegn Allison í marki Liverpool. Inn fór boltin þó ekki. Í lok leiks setti Takumi Minamino boltann svo yfir opið mark gestanna. Markalaust jafntefli niðurstaðan.

Liverpool var án Mo Salah og Sadio Mane sem leika í Afríkukeppninni og munar um minna. Blaðamaður Mirror vildi eftir leik ræða við Jurgen Klopp um samningstöðu Salah. Sá þýski var ekki sáttur við það.

„Ég er ekki sáttur með það þegar blaðamenn spyrja um svona hluti og hafa áhyggjur af samningamálum leikmanna sem hefur ekkert með þennan leik okkar að gera.“ sagði Klopp.

Samningur Salah rennur út eftir 16 mánuði, framlengi hann ekki samning sinn er ljóst er að Liverpool gæti selt hann í sumar. Salah hefur sagt að Liverpool verði að ganga að kröfum hans en hingað til hefur félagið ekki viljað gera það.