Tottenham og Chelsa mættust í seinni undanúrslitaleik liðanna í enska deildarbikarnum í kvöld. Leikið var á Tottenham Hotspur vellinum.
Chelsea var með tveggja marka forystu frá fyrri leiknum en Thomas Tuchel, stjóri liðsins, tefldi fram sterku byrjunarliði.
Pierluigi Gollini, varamarkvörður Tottenham, stóð á milli stanganna í kvöld en Hugo Lloris var á bekknum. Gollini gerði sig sekan um skelfileg mistök á 18. mínútu þegar hann missti boltann eftir hornspyrnu, boltinn hrökk í bakið á Antonio Rudiger og þaðan í netið og Chelsea komið í þriggja marka forystu í einvíginu.
Tottenham héldu að þeir hefðu fengið dæmda vítaspyrnu eftir um hálftíma leik en endursýningin sýndi að brot Rudiger á Hojbjerg var utan teigs og engin vítaspyrna dæmd. Önnur vítaspyrna var tekin af Tottenham í seinni hálfleik áður en Harry Kane kom boltanum í netið en hann var rangstæður.
Tottenham tókst ekki að skora löglegt mark í leiknum og 1-0 sigur Chelsea í kvöld og 3-0 samtals í einvíginu staðreynd. Chelsea mætir annað hvort Liverpool eða Arsenal í úrslitaleik deildarbikarsins á Wembley í lok febrúar.