Þeir Trent Alexander-Arnold og Alisson Becker, leikmenn Liverpool, eru lausir úr einangrun og gætu spilað gegn Arsenal í fyrri leik liðanna í undanúrslitaleik deildarbikarsins annað kvöld.
Jurgen Klopp, knattspyrnustjóri liðsins, staðfesti þetta á fréttamannafundi í dag. Hann sagði að leikmennirnir hefðu jafnað sig af kórónaveirunni og væru báðir byrjaðir að æfa með liðinu á nýjan leik.
Liverpool verður án Mohamed Salah, Sadio Mane og Naby Keita í leiknum en þeir leika allir á Afríkukeppninni í Kamerún um þessar mundir.
Þá eru Thiago og Divock Origi einnig frá vegna meiðsla.
