Jón Daði Böðvarsson framherji Milwall er í vondri stöðu hjá félagsliði sínu. Þessi stóri og kraftmikli framherji hefur varla fengið að spila á þessu tímabili.
Jón Daði fær varla að vera í hóp hjá Milwall en hann spilaði örfáar mínútur í ágúst en síðan hafa mínúturnar ekki verið margar.
Framherjinn fékk leyfi til að fara í landsliðsverkefni Íslands sem nú er í gangi. Það segir ýmislegt um stöðu hans hjá Milwall þar sem liðið er á fullu að spila.
„Mér finnst hans dagar búnir, ekki getað neitt frekar lengi. Ekkert að spila hjá félagsliði, þrjú mörk í 60 landsleikjum. Ég veit ekki af hverju hann er í þessum hóp,“ sagði Albert Brynjar Ingason en íslenska liðið mætir Úganda og Suður-Kóreu í æfingaleikjum.
Hjörvar Hafliðason segist ekki geta varið Jón Daða. „Ég get ekki haldið vörnum uppi fyrir Jón Daða, Kit maðurinn fer frekar í framlínuna en Jón Daði.“
Jóhann Már Helgason segir langur tími frá því að Jón Daði var mikilvægur fyrir landsliðið. „Hann var með skýrt og gott hlutverk hjá Lars Lagerback, það er langt síðan að það var.“
