Aron Einar Gunnarsson snýr aftur í landsliðshóp Íslands sem mætir Venesúela og Albaníu síðar í þessum mánuði.
Aron hefur ekki leikið í meira en ár vegna máls gegn honum en það hefur nú verið fellt niður.
Birkir Bjarnason hefur verið fyrirliði í hans fjarveru en Aron tekur nú við því aftur. Arnar Þór Viðarsson staðfestir þetta á blaðamannafundi í Laugardal.
„Ég held það viti allir hvað Aron Einar getur gefið þessu liði. Það var aldrei spurning að velja leiðtoga eins og Aron í liðið,“ segir Arnar.
Arnar segist ekki hafa þurft að sannfæra Aron mikið um að snúa aftur.
„Aron er búinn að vera mjög jákvæður frá því við töluðum saman. Hann hlakkar til að spila með landsliðinu og hjálpa til.“