Í gær fór fram fyrsti dagur réttarhalda yfir knattspyrnumanninum Benjamin Mendy. Frakkinn, sem er á mála hjá enska knattspyrnufélaginu Manchester City, er sakaður um átta nauðganir, eitt kynferðisbrot og eina tilraun til nauðgunar. Atvikin eiga að hafa átt sér stað frá október 2018 til ágúst 2021.
Hinn 28 ára gamli Mendy var handtekinn í ágúst í fyrra. Hann hefur verið laus gegn tryggingu frá því í janúar á þessu ári. Hann neitar alfarið sök.
Einnig er réttað yfir vini Mendy, Louis Saha Matturie. Sá er sakaður um átta nauðganir og fjögur kynferðisbrot. Alls eru þrettán konur sem tengjast brotum þeirra félaga.
Breskir miðlar keppast við það að flytja fréttir af þeim sögum sem sagðar hafa verið af Mendy og Saha í réttarsal.
Saksóknarinn Timothy Cray segir frá konu sem fór heim til Mendy eftir að hafa farið út með honum og einum öðrum manni í mat og drykki.
„Næsta dag var hún í sturtu. Mendy kom inn og fór að eiga við sig fyrir framan hana,“ segir Cray.
„Hún sagði honum að fara og reyndi að ná í handklæði til að hylja sig. Hún reyndi einnig að ná í nærfötin sín úr pokanum sínum en Mendy tók hann af henni og sagði „ég vil bara sjá þig.“
„Hún reyndi að hreyfa sig en gat ekki komist burtu frá honum.“
Fleiri frétta er að vænta af dómsmáli Benjamin Mendy og munum við fylgjast náið með gangi mála