Knattspyrnudómarinn Tómas Meyer rotaðist er hann dæmdi leik Augnabliks og KH í þriðju deild karla á dögunum. Hann var fluttur á sjúkrahús, þar sem kom í ljós að atvikið var í raun lán í óláni.
,,Ég dæmi þarna aukaspyrnu í kringum fimmtugustu mínútu, bara venjulega aukaspyrna og ég dæmi hana bara og hleyp síðan aðeins frá. Næsta sem ég man eftir er bara að hafa vaknað eftir rothögg,“ sagði Tómas í útvarpsþætti Fótbolta.net á X-inu um helgina.
,,Ég átti rosalega erfitt með að ná andanum eftir að ég vaknaði, ein versta lífsreynsla sem ég hef lent í. Ég næ síðan eðlilegri öndun en er náttúrulega bara í tómu sjokki, allur blóðugur. Ég hef nú ekki séð upptöku af atvikinu en boltinn kemur væntanlega á gagnaugað á mér og ég lendi síðan á andlitinu og brjóstkassanum.“
Eftir að Tómas var fluttur á sjúkrahús eftir atvikið kom í ljós að hann var ekki heill heilsu. ,,Á sjúkrahúsinu kemur í ljós að ég var ekki alveg í lagi. Ég var með alltof háan blóðþrýsting.“
Hann var sendur á Landsspítalann í rannsóknir. ,,Þá kemur í ljós að þetta er ættgengt. Núna er ég undir eftirliti og líður mjög vel. Hlakka til að takast á við það verkefni sem bíður mín núna,“ sagði Tómas, en efri mörkin úr blóðþrýstingsmælingu Tómasar voru 267, sem er gífurlega hátt.
,,Þetta hefði getað farið svo illa. Þau á spítalanum kölluðu þetta hægfara dauða (e. slow death). Þarna fékk ég gott gult spjald sem ég tek fagnandi.“