Amazon þættirnir um Arsenal og gengi liðsins á síðasta tímabili hafa vakið mikla athygli en þrír þættir hafa þegar verið settir í sýningu. Fleiri eru væntanlegir.
Það sem mesta athygli hefur vakið í þáttunum eru ræður Mikel Arteta stjóra liðsins. Arteta fer leiðir sem ekki hafa sést oft í að ná til leikmanna.
Ein af ræðum hans sem birtist í næstu þáttum er ræða hans fyrir leik gegn Brentford á heimavelli. Þar notaði hann Twitter færslu frá Ivan Toney framherja Brentford til að nota í ræðu sinni.
„Þetta hefur verið í maga mínum síðustu mánuði. Þetta er Toney eftir leikinn á þeirra heimavelli,“ sagði Arteta og birti Twitter færslu Toney eftir fyrri leikinn á skjá í klefanum.
Nice kick about with the boys. ⚽️ @BrentfordFC
— Ivan Toney (@ivantoney24) August 13, 2021
„Gaman að fara í fótbolta með strákunum í kvöld,“ skrifaði Toney eftir sigur á Arsenal í fyrstu umferð á síðustu leiktíð.
Arteta var ekki glaður með þetta. „Í dag spilum við í okkar húsi, strákar það verður bara eitt lið á vellinum og það verða við. Við tökum helvítis boltann og tökum yfir leikinn. Við vinnum þennan helvítis leik.“
Arsenal vann leikinn og Alexandre Lacazette þá framherji liðsins svaraði í sömum mynt á Twitter.
Nice kick about with the boys. ⚽️@Arsenal 😘
— Alexandre Lacazette (@LacazetteAlex) February 19, 2022