„ÉG er sáttur með frammistöðuna í fyrri hálfleik, við fylgdum leikplaninu,“ sagði Arnar Þór Viðarsson landsliðsþjálfari eftir 1-0 sigur á San Marínó í æfingaleik í kvöld.
Frammistaða liðsins gegn slakasta landsliði í heimi var ekki góð og hefur liðið fengið mikla gagnrýni frá þjóðinni.
„Við erum með betri leikmenn en þeir, þá er hættan að detta niður á þeirra hraða. Ég var ágætlega ánægður með fyrir hálfleikinn, skoruðum snemma og fengum fjögur góð færi þar fyrir utan og hefðum þurft að klára eitt af þeim til viðbótar þá spilast þetta öðruvísi.“
„Það slökknar á okkur í seinni hálfleik, við erum ekki sáttir með frammistöðuna þarna. Það er ekki í boði að fara á þetta plan, þú getur ekki hætt að spila boltanum fram á við. Þetta er landsliðs fótbolti.“
„Ég held að hugarfarið hafi verið mjög gott hjá öllum, þetta er spurning um að klára mark númer tvö til að slökkva á þeim. Við lærum af þessu en erum ánægðir með sigurinn.“