Landsliðshópurinn var opinberaður í vikunni og var hann skeggræddur í íþróttavikunni með Benna Bó á föstudaginn. Hjörvar Hafliðason, doktor Football og íþróttastjóri Viaplay og Jóhann Már Helgason, íþróttaskríbent og sérfræðingur í þættinum sátu í settinu með Benedikt Bóas.
Rætt var um framherjana í liðinu en Hólmbert Aron Friðjónsson er með 2 mörk í landsliðstreyjunni.
Andri Lucas Guðjohnsen er einnig með 2 mörk, bróðir hans Sveinn Aron er með eitt mark og sagði umsjónarmaðurinn að þetta sé svolítið þunnt kaffi ef kaffi skyldi kalla.
„Ég hefði alltaf tekið Þorleif inn,“ sagði Hjörvar Hafliðason og átti við Þorleif Úlfarsson leikmann í MLS deildinni. „Líka upp á söguna og búa til fjör í kringum leikina. Það er ekkert hægt að skauta fram hjá því að umtalið hefur verið neikvætt og það hefði verið gaman að fá hann þarna inn. Thor son of Odinn, eins og kaninn kallar hann,“ bætti hann við.
Þorleifur skoraði frábært mark í MLS deildinni sem vakti mikla athygli enda ekki á hverjum degi sem Íslendingur skorar í deildinni. Þeir Benedikt og Jóhann ræddu markið en Hjörvar benti á að Þorleifur hefði ofboðslegt sjálfstraust miðað við fagnið. „Að rífa sig úr treyjunni og taka á sig gula spjaldið og vera með bol kláran fyrir ömmu sína er geggjað. Þegar hann setti í töskuna var bolurinn klár. Það sýnir sjálfstraustið sem gaurinn hefur.“