Breiðablik vann 3-0 sigur gegn Íslands- og bikarmeisturum Víkings í stórleik kvöldsins í Bestu deild karla í fótbolta.
Hart var barist í fyrri hálfleik en hvorugu liði tókst að skora og staðan markalaus þegar liðin gengu til búningsherbergja. Ísak Snær Þorvaldsson skoraði svo sjöunda mark sitt á leiktíðinni er hann kom Blikum yfir á 56. mínútu.
Mörk frá Jasoni Daða og Kristni Steindórssyni á fjögurra mínútna kafla gerðu út um leikinn fyrir Blika sem spiluðu Víkinga sundur og saman. Kristall Máni Ingason fékk að líta rauða spjaldið fyrir olnbogaskot undir lok leiks er Blikar hirtu öll stigin.
Breiðablik er átta stigum á undan Víkingi á toppi deildarinnar og eiga þar að auki leik til góða á Íslandsmeistarana en Víkingar eru með 10 stig eftir sjö leiki.
Víkingur 0 – 3 Breiðablik
0-1 Ísak Snær Þorvaldsson (’56)
0-2 Jason Daði Svanþórsson (’73)
0-3 Kristinn Steindórsson (’77)
KR vann 1-0 sigur á Keflavík í Vesturbæ. Þorsteinn Már Ragnarsson skoraði sigurmark KR-inga með skalla á 67. mínútu. KR er í fimmta sæti með 10 stig en Keflvíkingar eru í vandræðum með fjögur stig eftir sjö leiki.
KR 1 – 0 Keflavík
1-0 Þorsteinn Mar Ragnarsson (’67)
Þá vann Fram fyrsta leik sinn á tímabilinu gegn Leikni á Domusnovavellinum í Breiðholti. Gestirnir leiddu 1-0 í hálfleik eftir mark Fred Saraiva á 11. mínútu. Emil Berger jafnaði metin fyrir Leikni á 64. mínútu en Guðmundur Magnússon skoraði sigurmark Framara átta mínútum síðar. Lokatölur 2-1.
Fram fer upp í 8. sæti með sigrinum en Leiknir situr á botninum með tvö stig og þarf að bíða lengur eftir fyrsta sigri liðsins á leiktíðinni.
Leiknir R. 1 – 2 Fram
0-1 Fred Saraiva (’11)
1-1 Emil Berger (’64)
1-2 Guðmundur Magnússon (’72)
