Liverpool tryggði sér í vikunni farseðilinn í úrslitaleik Meistaradeildar Evrópu þar sem þeir mæta Real Madrid í París 28. maí.
Stuðningsmenn Liverpool eru þó ekki á eitt sáttir við UEFA, skipuleggjendur keppninnar, en stuðningsmenn klúbbsins fá tæpa 20 þúsund miða en völlurinn tekur 80 þúsund manns í sæti. 12 þúsund miðar fara til fótboltaáhugamanna víða um heim og 23 þúsund miðum úthlutar UEFA til styrktaraðila, knattspyrnusambanda í Evrópu og fjölmiðla.
Stuðningsmenn Liverpool eru ekki sáttir við að fá svona fáa miða og þykja miðarnir auk þess heldur dýrir og hafa hækkað mikið undanfarin ár. Þeir skrifuðu opið bréf til Aleksander Ceferin og UEFA í Liverpool Echo þar sem þeir krefjast breytinga.
„Liverpool er komið í úrslitaleik Meistaradeildarinnar. Fyrir okkur stuðningsmenn er þetta stærsta augnablik tímabilsins en bara fyrir nokkra. Þúsundir munu ekki fara til Parísar þar sem ekki er nóg af miðum. Aftur.“
„Stade de France er með 75 þúsund sæti. LFC og Madrid fá undir 20 þúsund miða og munu alvöru stuðningsmenn aðeins vera 52% af vallargestum.“
„Fyrir þá sem eru svo heppnir að fá miða, þá gæti kostnaðurinn komið í veg fyrir að þeir fari. Flestir miðar kosta 180 evrur hver. Frá 2018, þegar LFC spilaði síðast við RM í úrslitaleiknum hefur miðaverð hækkað um 38%.“
„UEFA veit að fótbolti án stuðningsmanna er ekkert.“
