Arsenal ætlar að bjóða Mikel Arteta nýjan samning fyrir lok þessa tímabils. Þetta segir á vef Daily Mail.
Samningur stjórans rennur út eftir næsta tímabil. Vill Arsenal því endurnýja samning hans til að koma í veg fyrir að hann fari inn í næsta tímabil með innan við ár eftir af samningi sínum
Stjórnendur Arsenal eru ánægðir með störf Arteta, þrátt fyrir að Arsenal hafi hafnað í áttunda sæti ensku úrvalseildarinnar bæði tímabilin undir hans stjórn. Undir stjórn Arteta varð Arsenal bikarmeistari á þarsíðustu leiktíð.
Telja stjórnendurnir að liðið hafi tekið framförum undir stjórn Arteta. Hann byggir liðið í kringum unga leikmenn á borð við Bukayo Saka og Emile Smith Rowe. Þá hikar Spánverjinn ekki við að henda stjörnum liðsins á bekkinn eða úr hópnum, eins og hefur sýnt sig með bæði Mesut Özil og nú síðast Pierre-Emerick Aubameyang.
Á dögunum kom fram orðrómur um að Manchester City sæi Arteta sem hugsanlegan arftaka Pep Guardiola hjá Manchester City. Samningur þess síðarnefnda við Man City rennur út á sama tíma og samningur Arteta við Arsenal. Arteta var aðstoðarmaður Guardiola hjá Man City áður en hann tók við Arsenal.
Arteta er sagður ánægður hjá Arsenal og er hann klár í viðræður um nýjan samning.
