Ragnar Sigurðsson, fyrrum atvinnu- og landsliðsmaður í knattspyrnu, hefur lagt knattspyrnuskóna á hilluna. Þetta er fullyrt í hlaðvarpsþættinum Dr. Football í dag.
,,Þetta er stórt. Þetta er maður sem var frábær í Svíþjóð, Danmörku og Rússlandi. Hann átti geggjaðan feril,“ sagði Hjörvar Hafliðason og spurði síðan einn af sérfræðingum þáttarins, Albert Brynjar Ingason sem þekkir vel til Ragga Sig, hvort hann vissi ástæðuna á bak við þessa ákvörðun.
,,Hann er búinn að vera reyna finna þennan neista síðustu ár. Þú vilt ekkert taka skyndiákvörðun um að hætta, þú reynir stundum að leita að þessum neista með ákveðnum breytingum. Hann reyndi það en á einhverjum tímapunkti verður maður að vera heiðarlegur með þetta og taka þessa ákvörðun eins erfið og hún er,“ sagði Albert Brynjar Ingason, góðvinur Ragnars.
Ragnar á að baki 97 leiki fyrir A-landslið Íslands, hann myndaði ásamt Kára Árnasyni, eitt besta miðvarðarpar í sögu íslenska landsliðsins og fór með Íslandi á tvö stórmót þar sem að hann skoraði meðal annars eftirminnilegt mark í 2-1 sigri Íslands á Englandi í 16- liða úrslitum EM 2016.
Ragnar átti einnig farsælan atvinnumannaferil en hann spilaði og er mjög vel liðinn eftir tíma sinn hjá FC Kaupmannahöfn, þá var hann einnig á mála hjá liðum á borð við Fulham, Krasnodar, Rubin Kazam og Rostov.
Ragnar er uppalinn hjá Fylki og hann endaði knattspyrnuferil sinn með því að leika með liðinu hér heima á síðasta tímabili.