Sóknarmaðurinn Ousmane Dembele er á förum frá Barcelona. Mateu Alemany, yfirmaður knattspyrnumála hjá félaginu segir að leikmaðurinn ætti að finna sér nýtt félag sem fyrst eftir að upp úr slitnaði í viðræðum hans við félagið.
Sjálfur segist Dembéle, sem rennur út á samningi hjá Barcelona í sumar, ekki ætla að láta félagið kúga sig.
Hann virðist kominn með nóg af stöðu sinni hjá Barcelona og gaf út yfirlýsingu á dögunum.
,,Í hartnært fjögur ár hafa slúðursögur um mig farið á flug og logið hefur verið upp á mig í þeim tilgangi að skaða mig,“ segir meðal annars í yfirlýsingu Dembele.
Hann segist ekki ætla að láta kúga sig, hann sé 24 ára gamall og búi eins og aðrir einstaklingar yfir kostum og göllum. Hann hafi hins vegar verið að ganga í gegnum erfið meiðslatímabili en hafi aldrei kvartað undan stöðu sinni. ,,Ég hef alltaf staðið mína plikt vegna þess að knattspyrna er mín ástríða.“
Hann segir að þrátt fyrir allt vilji hann gera vel fyrir félag sitt en hann hefur verið sakaður um að hafa sýnt félaginu vanvirðingu með því að láta samning sinn líða áfram á þann stað sem hann er nú á.
Með sex mánuði eftir af samningi sínum má Dembele ræða við önnur félög utan Spánar. Ef ekki næsta að selja hann frá Barcelona í janúar, getur hann farið á frjálsri sölu í sumar.
Dembele gekk til liðs við Barcelona frá Dortmund í ágúst árið 2017 fyrir rúmar 140 milljónir evra.