Það vakti athygli einhverra að sóknarmaðurinn Anthony Martial hafi ekki verið í hópnum hjá Manchester United í jafnteflinu gegn Aston Villa í gær. Ralf Rangnick, stjóri liðsins, segir það hafa verið vegna þess að Martial sjálfur hafi ekki viljað vera með.
,,Hann vildi ekki vera í hópnum. Hann hefði annars verið í honum en hann vildi það ekki. Það er ástæðan fyrir því að hann ferðaðist ekki með okkur,“ sagði Rangnick. Man Utd var aðeins með átta leikmenn á bekknum í gær í stað níu.
Hinn 26 ára gamli Martial virðist ekki eiga framtíð hjá Man Utd. Hann hefur valdið vonbrigðum frá því hann kom frá Monaco á um 60 milljónir evra árið 2015.
Martial hefur verið orðaður við Sevilla undanfarið.
Frakkinn þénar 250 þúsund pund í vikulaun hjá Man Utd. Það samsvarar rúmum 44 milljónum íslenskra króna.