Naby Keita miðjumaður Liverpool situr fastur í Gíneu og er óvíst hvort eða hvernig hann kemst aftur til Englands. Leik Gíneu og Marokkó í undankeppni HM var aflýst vegna valdaránstilraunar í Gíneu.
Lið Marokkó fékk undanþágu til að fljúga burt frá landinu en annars hefur öllum landamærum til og frá landinu verið skellt í lás.
„Við gleðjumst yfir því að hann sé öruggur og að það er hugsað vel um hann,“ sagði talsmaður félagsins um málið.
„Staðan getur fljótt breyst og við munum vera með beina línu til landsins. Við reynum að koma Naby til Liverpool sem fyrst og það á öruggan hátt.“
Keita er mikilvægur hlekkur í liði Liverpool á þessari leiktíð en miðja liðsins er þunnskipuð og þarf Klopp á öllum sínum mönnum að halda.