Ísland gerði 2-2 jafntefli gegn Norður-Makedóníu í gær í undankeppni HM. Frammistaða íslenska liðsins stóran hluta leiksins var ekki góð, í raun mjög slæm. Norður-Makedónía komst í 0-2 en íslenska liðið sýndi karakter og kom til baka. Brynjar Ingi Bjarnason og Andri Lucas Guðjohnsen skoruðu mörkin.
Arnar Þór var skiljanlega mjög reiður í hálfleik og hann sagði frá því hvað gekk á í búningsklefanum.
„Ég öskraði svo mikið að ég missti röddina, ég öskraði í einhverjar þrjár mínútur og svo gekk ég út og Eiður Smári tók við. Ég hef aldrei verið svona reiður. Ég lofaði sjálfum mér að ég ætlaði ekki að vera þessi þjálfari en ég tapaði þeirri baráttu,“ sagði Arnar Þór á fréttamannafundi í gær.
Arnar Þór fór þá yfir mistök íslenska liðsins. „Við vorum að henda einföldum innköstum í lappirnar á andstæðingi, horn sem við fengum fóru ekki í rétt svæði og við fáum á okkur mörk þar sem er hlaupið fram fyrir okkur og skallað á nærsvæði. Þetta ræðum við en ábyrgðin er hjá mér.“
„Ég skal viðurkenna að þetta er sá hluti af fótboltanum sem maður hefði viljað fá meiri tíma til að æfa en það er erfitt í þessum þriggja leikja glugga. Við fengum tvær æfingar fyrir leikinn gegn Rúmeníu og eina fyrir þennan leik. Við erum að labba í gegnum þetta á einhverjum gönguæfingum en þetta þarf meiri athygli og meiri tíma,“ sagði Arnar að endingu.