Ashley Young, leikmaður Aston Villa, hvetur sitt gamla félag, Manchester United, til að krækja í Marco Verratti frá Paris Saint-Germain.
Hinn 28 ára gamli Verratti kom til PSG frá Pescara á aðeins 10,8 milljónir punda árið 2012. Hann hefur reynst Parísarliðinu frábær fengur. Ítalinn hefur komið að 67 mörkum í 349 leikjum fyrir félagið og sannað sig sem virkilega traustur leikmaður aftast á miðju PSG.
,,Man Utd hefur vantað Michael Carrick-týpuna í mörg ár. Þeir hafa aldrei leyst hann af. Ekki misskilja mig, Fred og McTominay eru góðir leikmenn en ég held að það sé ekki til annar Michael Carrick,“ sagði Young í BBC Radio 5 Live.
,,Ég horfði á leik PSG og Manchester City og ég held að Marco Verratti sé sá sem kemst næst því að vera eins og Carrick en enginn hefur farið og reynt að sækja hann.“
,,Ég held að hann yrði ótrúlega góður fengur fyrir Manchester United,“ sagði Young að lokum.