Samkvæmt heimildum 433.is er Valur að næla í markvörðinn Guy Smit frá Leikni Reykjavík. Hinn 26 ára gamli Smit hefur verið hjá Leikni síðustu tvö tímabil. Hann varði mark liðsins með miklum sóma í Pepsi Max-deildinni í sumar.
Fyrir hjá Val er markvörðurinn Hannes Þór Halldórsson. Hann er samningsbundinn út næstu leiktíð. Möguleiki er á því að riftunarákvæði sé í samningi Vals og Hannesar, það er þó ekki staðfest.
„Þeir hljóta að vera komnir á endastöð í sínu samstarfi,“ sagði Hjörvar Hafliðason í Dr. Football í gær um samstarf Vals og Hannesar.
Hannes var yfirburðar maður í liði Vals í sumar og var einn af fáum leikmönnum liðsins sem stóð undir væntingum. „Fer ekki Hannes Þór Halldórsson í KR? Hann hefur spilað fleiri leiki fyrir Fram en KR,“ sagði Hjörvar sem telur að Hannes sé Framari en hann átti frábær ár í KR:
Kristján Óli Sigurðsson telur útilokað að KR geti borgað sömu laun og Valur. „Hannes er á samningi, hann á ár eftir. 1,4 milljón á mánuði. Hver ætlar að borga það annar á Íslandi? Sénsinn bensinn að KR ætli að borga honum það,“ sagði Kristján.
Hjörvar velti því þá fyrir sér hvort Breiðablik gæti látið til skara skríða. „Gæti Óskar Hrafn hugsað sér að taka hann til að taka næsta skref í Evrópu?,“ sagði Hjörvar en Kristján Óli taldi það útilokað
Hjörvar sagði að það yrði áhugavert að sjá hvað yrði um Hannes Þór sem er besti markvörður í sögu Íslands.
