Rætt er um það í nokkrum enskum miðlum í dag að Sheikh Mansour, eigandi Manchester City, vilji fá Kylian Mbappe til félagsins, sama hvað það kostar.
Hinn 22 ára gamli Mbappe hefur verið magnaður fyrir Paris Saint-Germain síðustu ár. Samningur hans í frönsku höfuðborginni rennur út næsta sumar. Hann hefur hingað til ekki gert sig líklegan til að framlengja.
Auk Man City hefur Mbappe í dágóðan tíma verið orðaður sterklega við spænska stórveldið Real Madrid.
Real bauð tæplega 150 milljónir punda í sumar. Mörgum þykir ótrúlegt að PSG hafi hafnað því tilboði í ljósi samningamála Mbappe.
Þrátt fyrir að hægt verði að fá Mbappe á frjálsri sölu næsta sumar, skrifi hann ekki undir hjá PSG, er ljóst að það félag sem krækir í framherjann þarf að greiða honum ansi veglegar upphæðir í laun.