Óskar Hrafn Þorvaldsson, þjálfari Breiðabliks, segir sína menn heilt yfir geta verið sátta með tímabilið í Pepsi Max-deild karla.
Blikar voru lengi vel með pálmann í höndunum en tap gegn FH í næstsíðustu umferð – og sigur Víkings gegn KR á sama tíma – þýddi að Víkingi nægði að sigra Leikni í dag til þess að verða Íslandsmeistari.
,,Við getum verið býsna ánægðir með þetta tímabil. Við setjum stigamet, Breiðablik hefur aldrei fengið 47 stig í deildinni. Við skorum 55 mörk, fáum á okkur 21. Við förum þrjár umferðir áfram í Evrópu,“ sagði Óskar við Stöð 2 Sport eftir leik.
,,Ef maður horfir á þetta af auðmýkt þá hljótum við að líta á þetta sem tímabil sem getur verið drifkraftur inn í næsta tímabil. Það er alveg ljóst að sú staðreynd að við tökum silfrið hér mun vera alvöru innspýting fyrir okkur inn í veturinn.“
Óskar var spurður út í það hvort hann teldi Blika vera komna langt frá því hann tók við árið 2019.
,,Við erum alls ekki komnir langt, við erum komnir mjög stutt. Við eigum ansi mikið inni. Núna tekur við mikil vinna hjá teyminu, leikmönnunum, félaginu öllu, við að koma liðinu lengra áfram, gera það ennþá betra og gera enn harðari atlögu að öllu sem er í boði á næsta ári.“