Breiðablik tók á móti Val í sannkölluðum toppslag í efstu deild karla í fótbolta á laugardag. Leikið var á Kópavogsvelli. Það var nokkuð jafnt með liðunum framan af og markalaust í hálfleik.
Blikar fengu svo víti á 61. mínútu eftir mikið klúður í varnarleik Valsverja og Árni Vilhjálmsson fór á punktinn og skoraði örugglega fram hjá Hannesi í markinu. Blikar voru mikið sterkari aðilinn eftir að hafa komist í forystu og bættu við öðru marki tíu mínútum síðar þegar að Kristinn Steindórsson skoraði eftir góðan undirbúning frá Jasoni Daða.
Árni Vilhjálmsson kórónaði frábæra frammistöðu Breiðablik með öðru marki sínu í leiknum og þriðja marki Blika þegar að fjórar mínútur voru eftir af venjulegum leiktíma. Þar við sat og lokatölur 3-0. Breiðablik situr nú á toppi deildarinnar með 44 stig þegar að tvær umferðir eru eftir. Víkingar eru í 2. sæti með 42 stig og KR í því 3. með 38 stig.
Daði Rafnsson þjálfari hjá HK býr rétt hjá Kópavogsvelli og tók upp myndskeið þegar Árni var á punktinum. Sjón er sögu ríkari.
Ó er @ArniVill kominn heim? pic.twitter.com/xsvvhM3A0p
— Daði Rafnsson (@dadirafnsson) September 12, 2021