Arnar Gunnlaugsson telur að Andri Lucas Guðjohnsen hafi allt til bruns að bera til að ná mjög langt sem knattspyrnumaður. Andri Lucas skoraði sitt fyrsta mark fyrir A-landsliðið á sunnudag.
Andri er 19 ára gamall en Arnar hefur kynnst Andra á æfingum með Víkingi. „Alveg sammála því, hann er rosa nía, bara að sjá markið sem hann gerði. Hann er búinn að gera mikið af svona mörkum fyrir unglingaliðið hjá Real Madrid þar sem hann tekur sér stöðu, heldur varnarmönnum frá sér og þarf í raun bara eina snertingu til að snúa sér eins og það kallast ‘on the sixpence’,“ sagði Arnar í sjónvarpsþætti 433.is í vikunni.
Andri Lucas hefur mikið til bruns að bera en Arnar telur að Daníel Tristan Guðjohnsen og Andri hafi mikla hæfileika.
„Hann var að æfa aðeins með okkur í Víkingi og yngri bróðir hans líka. Holningin á þeim báðum er eiginlega allt öðruvísi en á Eiði og Sveini Aroni (eldri bróður Andra og Daníels). Þeir eru með aðeins léttari vöðva og ekki eins stóran rass, sem að Eiður reyndar nýtti mjög vel á sínum ferli. Holningin er alveg fullkomin til að skapa góðan fótboltamann og hausinn þeirra virkar í flottu lagi.“
„Það gerist auðvitað núna, þegar Andri Lucas kemur inn á og skorar, þá fara allir af stað og allir fara að búast við miklu. Ég held að hann sé vanur þessu, bæði í gegnum afa sinn og pabba sinn og hann er líka leikmaður Real Madrid þar sem pressan er á alla daga. Hann virkar eins og týpan sem er að fara höndla þetta vel.“