Breiðablik vann góðan útisigur á Stjörnunni í Pepsi Max-deild karla í kvöld. Leikurinn var liður í 16. umferð.
Viktor Karl Einarsson kom gestunum yfir um miðjan fyrri hálfleik með glæsilegu marki.
Höskuldur Gunnlaugsson tvöfaldaði forystu Blika á 33. mínútu með marki beint úr aukaspyrnu.
Breiðablik leiddi sanngjarnt í hálfleik.
Höskuldur gerði sitt annað mark á 54. mínútu. Hann afgreiddi boltann þá smekklega í netið eftir góðan sprett.
Stjarnan minnkaði muninn þegar tæpar 20 mínútur lifðu leiks. Þar var að verki Oliver Haurits. Hann skoraði þá eftir fyrirgjöf frá Heiðari Ægissyni.
Nær komust heimamenn þó ekki. Lokatölur 1-3.
Breiðablik er í þriðja sæti deildarinnar með 29 stig. Liðið er stigi á eftir Víkingum og 4 stigum á eftir Val. Blikar eiga þó leik til góða á bæði lið.
Stjarnan er í níunda sæti með 16 stig, aðeins 3 stigum fyrir ofan HK sem er í fallsæti.