Chelsea er tilbúið til þess að greiða Romelu Lukaku 250 þúsund pund, um 43,4 milljónir íslenskra króna, á viku, komi framherjinn til félagsins frá Inter. Telegraph greinir frá.
Orðrómar um að hinn 28 ára gamli Lukaku gæti snúið aftur til Chelsea komu upp á dögunum. Belginn var á mála hjá enska liðinu á árunum 2011 til 2014.
Inter hafnaði fyrsta tilboði Chelsea í leikmanninn. Það hljóðaði upp á 100 milljónir evra. Það má þó búast við því að Chelsea geri annað tilboð.
Samkvæmt blaðamanni Telgraph, Matt Law, mun Lukaku samþykkja samningstilboð Chelsea hvað eigin kjör varðar. Það veltur því á félögunum tveimur að koma sér saman um kaupverð.
Lukaku skoraði 24 mörk í Serie A á síðustu leiktíð er Inter varð Ítalíumeistari í fyrsta sinn í ellefu ár.