Fyrrum atvinnumaðurinn Darren Bent segir verðið á framherja Tottenham, Harry Kane, vera allt of hátt. Hann telur ekki líklegt að Manchester City muni ganga að verðmiðanum.
Hinn 28 ára gamli Kane hefur verið orðaður við Man City í allt sumar. Tottenham hafnaði tilboði í hann upp á 100 milljónir punda í júní. Talið er að félagið vilji fá nær 150 milljónum punda.
,,Harry Kane er einn af bestu framherjum heims en hann er ekki 160 milljóna punda virði,“ sagði Bent við talkSPORT.
,,Hann er 28 ára og hefur glímt við meiðsli. Hvað færðu út úr honum? 4-5 ár? Ég held bara að það réttlæti ekki verðið á honum.“
,,Man City á peninginn til að kaupa hann en Pep Guardiola og eigendurnir hljóta að hugsa að 160 milljónir séu of mikið.“
,,Kannski 100 milljónir eða 120 milljónir. Það er raunhæfara verð á Harry Kane. En ef Daniel Levy segir að hann vilji 140, 150, 160 og Man City eru ekki tilbúnir að borga þá upphæð, þá mun enginn borga þá upphæð.“