Sölvi Geir Ottesen var nær dauða en lífi fyrir 19 árum síðan þegar hann og vinur hans lentu i hræðilegu bílslysi. Sölvi rifjaði slysið í samtali við Guðjón Guðmundsson á Stöð2 í gær.
Sölvi Geir er 37 ára gamall í dag en hann átti 13 ára feril í atvinnumennsku sem knattspyrnumaður og ætlar að leggja skóna á hilluna í haust. Sölvi er í dag einn af mikilvægustu leikmönnum Víkings sem er að berjast á toppi efstu deildar karla.
Slysið sem Sölvi og vinru hans lentu í átti sér stað föstudaginn 13. september 2002 þegar Sölvi Geir var aðeins 18 ára gamall.
„Við vorum að keyra dálítið hratt, hraðar en má, og félagi minn missir stjórn á bílnum og við förum út af á miklum hraða og fljúgum þarna einhverja 40 metra í lausu lofti niður brekku,“ segir Sölvi í viðtalinu á Stöð2 en í frétt Morgunblaðsins kemur fram að um hafi verið að ræða kappakastur við önnur ökutæki sem endaði illa.
„Lögreglumenn sem komu akandi á móti eftir Hafnarfjarðarveginum urðu vitni að kappakstri bílanna, sem endaði með því að bíllinn, sem er af BMW-gerð, fór í loftköstum út af veginum og valt 30 metra og skemmdi tvo kyrrstæða bíla áður en hann stöðvaðist í trjábeði. Brak úr bílnum dreifðist um víðan völl og voru starfsmenn Kópavogsbæjar kallaðir út til að hreinsa til á vettvangi. Í bílveltunni lagðist þakið á bílnum saman og þurfti að skera flakið í sundur til að komast að hinum slösuðu. Ökumaður og farþegar úr öðrum bílnum sem tók þátt í kappakstrinum gáfu sig fram við lögregluna en ekki er vitað hvað varð um þriðja bílinn. Ekki er grunur um ölvun við akstur,“ segir í frétt Morgunblaðsins frá 15 september þetta sama ár.
„Þetta var bara mjög slæmt bílslys þar sem ég fæ þakið ofan á hausinn á mér og kremst allur þarna í bílnum,“ segir Sölvi í viðtali við Guðjón Guðmundsson.
Bakmeiðsli hafa hrjáð Sölva alla daga frá slysinu og hafa þau meiðsli orðið til þess að hann hefur ekki alltaf getað spilað fótbolta. Augnablikið úr slysinu lifir með honum og hann gleymir því aldrei.
„Þetta gerir það. Þegar þú ert á svona miklum hraða í lausu lofti, þú gleymir ekki þannig augnabliki,“ segir Sölvi sem telur að einhver æðrimáttar hafi hjálpað til.
„Það var einhver sem var að vaka yfir mér á þessu augnabliki, það er nokkuð ljóst,“ segir þessi magnaði knattspyrnumaður.
