Kristján Óli Sigurðsson, sérfræðingur í hlaðvarpsþáttunum Dr. Football, er allt annað en hrifinn af liði ÍA. Liðið er á botni Pepsi Max-deildarinnar með 6 stig eftir ellefu leiki.
Kristján segir að það sé nánast útilokað að Skagamenn haldi sér uppi í efstu deild í haust. Þá hneykslaðist hann Jóhannesi Karli Guðjónssyni, þjálfara ÍA, fyrir að láta Albert Hafsteinsson fara frá félaginu fyrir síðasta tímabil. Albert hefur verið frábær fyrir Fram í Lengjudeildinni í ár. Hann skoraði til að mynda þrennu í síðasta leik gegn Kórdrengjum.
,,Liðið er bara ekki nógu gott. Kannski sorglegt fyrir alvöru stuðningsmenn ÍA, verandi að ‘refresha’ vefsíðurnar í kvöld að fylgjast með leikjum úr kannski Lengjudeildinni, að sjá Albert Hafsteinsson, týnda soninn af Skaganum, henda í þrennu með Fram og skjóta þá beint upp í Pepsi Max-deildina. Jói Kalli hafði aldrei not fyrir þennan strák,“ sagði Kristján í nýjasta þætti Dr. Football.
ÍA mætir Leikni á útivelli í næsta leik í deildinni. Liðið þarf nauðsynlega á sigri að halda þar.