Dele Alli vill fullvissa fólk um það að hann beri engan kala til Jose Mourinho sem var stjóri Tottenham frá 2019 þar til í apríl á þessu ári.
Dele Alli fékk nánast ekkert að spila á stórum kafla undir stjórn Mourinho og fékk hann nánast einungis tækifæri í FA bikarnum og Evrópudeildinni.Hann var áður mikilvægur hluti af landsliðshóp Englendinga en var ekki valinn í liðið fyrir EM 2020 sem nú er í gangi.
Tottenham spilaði 32 deildarleiki undir stjórn Mourinho og í þeim var Dele Alli aðeins á vellinum í 233 mínútur. Til að setja það í samhengi þá spilaði hann 385 mínútur í þeim sex leikjum sem Ryan Mason stýrði en hann tók tímabundið við stjórnartaumunum eftir brottrekstur Mourinho. Alli neitaði þó að gagnrýna Mourinho í viðtali við Goal:
„Ég kenni bara sjálfum mér um. Ég hefði átt að vera að skila betri frammistöðu. Það var frábær reynsla að vinna með Mourinho og ég lærði mikið af því,“ sagði Alli við Goal.