Jordan Pickford hefur verið flottur á EM í knattspyrnu í sumar og vill Trevor Sinclair meina að hann sé einn besti markmaður í heimi.
Pickford hefur byrjað alla leiki enska liðsins og hefur ekki enn fengið á sig mark í keppninni. Þar með hefur hann jafnað met Iker Casillas fyrir flesta leiki sem markmaður heldur hreinu á einu móti á EM.
“Ég er mjög ánægður með hann, sérstaklega af því að ég heyrði af því að hann hefur verið að tala við íþróttasálfræðing,” sagði Trevor Sinclair við talkSPORT.
“Ég hef áður gagnrýnt hann mikið og haft áhyggjur af einbeitingunni. Ekkert persónulegt gagnvart honum en mér hefur ekki fundist hann hafa það sem markmaður þarf að hafa.”
“Hann hefur snúið við blaðinu og ég er ánægður með vinnuna sem hann lagði í þetta því hann lítur út eins og einn besti markmaður í heimi eins og er,” sagði Sinclair að lokum við talkSPORT.