Knattspyrnukappinn, Guðjón Pétur Lýðsson er byrjaður að láta til sín taka á fasteignamarkaðnum í Vestmannaeyjum og hefur keypt tvær hæðir í húsi þar sem Landsbankinn er til húsa. Eyjafréttir segja frá.
ÍBV fékk Guðjón Pétur í vor frá Breiðablik en liðið leikur í Lengjudeildinni og situr þar í öðru sæti um þessar mundir.
Guðjón er þekktur fyrir að vera klókur á fasteignamarkaðnum og hefur hann meðal annars verslað sér húsnæði á Akureyri þegar hann lék fyrir KA.
Guðjón hefur keypt tvær efstu hæðirnar í
húsinu við Bárustíg 15 í Vestmannaeyjum, á efstu hæðinni verður gerð íbúð en á annari hæðinni er Vestmannaeyjabær með skrifstofur og leigir bærinn hæðina af Guðjóni.
„Ég hlakka til að leyfa þeim (krökkunum) að upplifa eyjuna og ætla að vera duglegur að fara á kayak og labba út um allt og skoða. Finnst eins og ég sé kominn á leynistað enda fegurðin á eyjunni mögnuð,“ sagði Guðjón Pétur við Eyjafréttir um dvölina í Vestmannaeyjum.
Guðjón hefur leikið átta leiki í Lengjudeildinni í sumar og skorað í þeim leikjum 3 mörk.