Orri Freyr Hjaltalín, þjálfari Þórs í Lengjudeild karla, var virkilega ósáttur með Knattspyrnusamband Íslands á dögunum fyrir að hafa dómara sem skráður er í erkifjendurna í KA sem línuvörð í leik liðsins gegn Fram. Þór tapaði leiknum 0-2 og fannst Orra dómgæslan í leiknum slök. Kristján Óli Sigurðsson, sérfræðingur í hlaðvarpsþættinum Dr. Football, segir afsökunina dapra.
,,Það er gjörsamlega galið að vera með aðstoðardómara frá hinu liðinu á Akureyri þetta myndi aldrei vera tekið í mál í Reykjavík, KSÍ á alveg nógu mikla peninga til að geta fengið einhvern hlutlausann í að koma hérna og dæma þessa leiki,“ sagði Orri við Fótbolta.net eftir leik.
Kristján sagði í Dr. Football í dag að afsökunin væri léleg, sérstaklega í ljósi þess að honum þykir heimamenn oft vera í hlutverki dómara á Akureyri.
,,Að kenna línuverði sem er skráður í KA að Þór hafi tapað leik fyrir langbesta liði Lengjudeildarinnar, það er lélegt afsökun. Ef það er einhvers staðar sem hefur verið heimadómgæsla í gegnum tíðina þá er það á Akureyri og Húsavík og Dalvík og Ólafsfirði. Ég veit ekki hvað maður hefur mætt oft í þorpið eða á KA-völlinn og það er alltaf bara einhverjir frændur leikmanna á línunni.“