Þeir Anthony Martial og Daniel James eru fáanlegir frá Manchester United fyrir rétt verð. Þetta segir í frétt ESPN. Þá kemur einnig fram að enska félagið sé tilbúið til þess að hlusta á tilboð í sjö aðra leikmenn.
Hinn 25 ára gamli Martial kom til Man Utd frá AS Monaco árið 2015 og voru miklar vonir bundnar við hann. Frakkanum hefur þó aldrei tekist að standa undir væntingunum.
Hinn 23 ára gamli James hefur verið hjá Man Utd frá árinu 2019. Þá kom hann frá Swansea. Honum hefur tekist að sýna fína spretti inn á milli en þó er félagið til í að selja ef gott tilboð berst.
Þá eru Rauðu djöflarnir tilbúnir til þess að hlusta á tilboð í þá Jesse Lingard, Brandon Williams, Diogo Dalot, Phil Jones, Alex Telles, Andreas Pereira og Axel Tuanzebe.