Manchester City hefur opnað á viðræður við Aston Villa um Jack Grealish, stjörnuleikmann síðarnefnda liðsins. The Guardian greinir frá.
Hjá Villa eru menn mjög harðir á því að halda Grealish. Það gæti þó orðið erfitt fyrir þá að standa fastir á því ef leikmaðurinn sjálfur óskar eftir sölu til Englandsmeistaranna. Ef til þess kemur myndi Villa líklega biðja um upphæð í kringum 100 milljónir punda fyrir hinn 25 ára gamla Grealish.
Ásamt Grealish er stjörnuframherji Tottenham, Harry Kane, áfram á óskalista Man City.
Kane er sjálfur talinn tilbúinn til þess að yfirgefa Tottenham. Hann er jafnframt spenntur fyrir því að leika fyrir Man City.
Englandsmeistararnir hafa þegar boðið einu sinni í Kane í sumar. 100 milljóna punda tilboði þeirra var hafnað af Tottenham.