Æfingaleik Manchester United og Preston hefur verið frestað vegna gruns um Covid smit innan herbúða fyrrnefnda félagsins. Þetta kemur fram á talkSPORT. Rauðu djöflarnir áttu að ferðast til Preston á laugardaginn, aðeins tveimur vikum áður en næsta leiktíð hefst.
Manchester United tilkynnti að nokkrir leikmenn liðsins væru í einangrun. „Það er lykilatriði hjá Manchester United að viðhalda sóttvarnaraðgerðum vegna COVID,“ sagði í yfirlýsingu frá félaginu.
„Í kjölfar sýnatöku er grunur um fáein smit innan liðsins. Leikmennirnir sem um ræðir eru nú einangrun og bíða eftir frekari niðurstöðum. Vegna varúðarráðstafana höfum við ákveðið að fresta leiknum gegn Preston á laugardaginn. Við biðjumst velvirðingar á þeim óþægindum og vonbrigðum sem þetta kann að valda stuðningsmönnum.“
Manchester United mætir Everton í síðasta leik undirbúningstímabilsins þann 7. ágúst næstkomandi. Liðið mætir svo Leeds viku seinna í ensku úrvalsdeildinni í fyrsta leik nýs tímabils.