Gary Martin, framherji Selfoss, er mun betri leikmaður fyrir liðið þegar liðsfélagi hans í sókninni, Hrvoje Tokic, er ekki með. Þetta sögðu þeir Hörður Snævar Jónsson og Hrafnkell Freyr Ágústsson í Markaþætti Lengjudeildarinnar í gær.
Hinn þrítugi Gary hefur gert fimm mörk í tólf leikjum fyrir Selfoss í Lengjudeildinni í ár. Hann kom til liðsins frá ÍBV í vor.
Enski framherjinn skoraði og lagði upp í síðasta leik í sigri á Vestra. Hrafnkell var hrifinn af Gary í leiknum, sem og undanfarnar vikur.
,,Mér finnst Gary bara miklu betri í þessu Selfoss-liði þegar hann er ekki með Tokic með sér, eins skrýtið og það hljómar, þeir eru báðir frábærir leikmenn. Einhvern veginn fær hann bara að vera aðalkallinn og það er spilað upp á hann.“
,,Tölfræðin sýnir það. Gary blómstrar þegar hann er einn þarna,“ bætti Hörður við.
Hér fyrir neðan má sjá umræðuna um Gary og Selfoss, sem og markaþátt Lengjudeildarinnar frá því í gær í heild sinni.