Samkvæmt Daily Mail hefur Manchester United áhuga á Jules Kounde, miðverði Sevilla.
Man Utd virðist vera að færast nær því að krækja í Raphael Varane frá Real Madrid. Miðað við nýjustu fréttir ætlar félagið ekki að láta það duga.
Hinn 22 ára gamli Kounde hefur verið hjá Sevilla frá árinu 2019. Hann hefur leikið virkilega vel og var til að mynda í franska landsliðshópnum á Evrópumótinu fyrr í sumar.
Kounde er samningsbundinn spænska liðinu til ársins 2024. Það er því ljóst að Man Utd þyrfti að reiða fram háa upphæð, ætli það sér að klófesta varnarmanninn unga.
Kounde hefur einnig verið orðaður við Chelsea og Tottenham í sumar.