Miðað við ný ummæli Ole Gunnar Solskjær, stjóra Manchester United, um Paul Pogba, miðjumann félagsins, er Norðmaðurinn bjartsýnn á að halda Frakkanum hjá félaginu.
Hinn 28 ára gamli Pogba hefur verið orðaður frá Man Utd undanfarið. Hann á aðeins eitt ár eftir af samningi sínum við félagið og hefur ekki gert sig líklegan til þess að skrifa undir nýjan.
Franska stórveldið Paris Saint-Germain hefur einna helst verið nefnt til sögunnar sem hugsanlegur áfangastaður Pogba.
,,Viðræðurnar eru í gangi á milli fulltrúa Paul og okkar. Allar þær samræður sem ég hef átt við Paul eru á þann veg að hann hlakki til leiktíðarinnar sem er framundan,“ sagði Solskjær um framtíð miðjumannsins.
Pogba hefur verið hjá Man Utd frá árinu 2016. Hann kom til félagsins frá Juventus á tæpar 90 milljónir punda.