Steven Gerrard, fyrrverandi leikmaður Liverpool var ekki hissa á að sjá Rafael Benitez taka við þjálfarstöðunni hjá Everton. Benitez tók við af Carlo Ancelotti en Spánverjinn var áður þjálfari erkifjenda í Liverpool frá 2004-2010 og vann nokkra titla með félaginu, þar á meðal Meistaradeildina árið 2005.
Gerrad var hins vegar hissa á að sjá sjálfan sig orðaðan við Everton en Gerrard er þjálfari Rangers í Skotlandi um þessar mundir. Gerrard segir Benitez ekki í sömu stöðu og hann sjálfur sem er uppalinn hjá félaginu.
Hann sagði í viðtali hjá ESPN: „Rafa fæddist ekki í borginni, hann er ekki ekta Liverpool maður. Hann lék ekki gegn Everton í 20 ár svo ég held að þetta séu allt öðruvísi aðstæður. Rafa er sinn eigin herra og tekur sínar eigin ákvarðanir. Það er ekkert skrítið að hann hafi viljað þjálfa í ensku úrvalsdeildinni hjá stóru félagi. Ég var í rauninni ekkert hissa á þessu. Ég var hins vegar mjög hissa á að sjá að ég hafi verið orðaður við félagið. Ég veit ekki hvaðan það kom, hvort þetta hafi bara verið slúður eða hvað. Ég er ekki alveg viss.“
„Ég myndi aldrei þjálfa Everton. Það kemur ekki til greina,“ bætti Gerrard við.