Gareth Bale gekk til liðs við Real Madrid árið 2013 fyrir metfé en hefur ekki verið í stóru hlutverki þar síðustu ár og er ekki vinsæll hjá stuðningsmönnum félagsins.
Leikmaðurinn var á láni hjá Tottenham á síðustu leiktíð en er núna mættur aftur til Madrídar. Óvíst er hvort að Bale fái hlutverk hjá liðinu í ár en Madrid er talið vilja selja leikmanninn vegna fjárhagsvandræða en hann er að fá um 600 þúsund pund í vikulaun.
Samkvæmt veðbönkum er líklegast að Bale gangi í raðir Cardiff sem er í Championship deildinni á Englandi. Samkvæmt Oddschecker er það líklegasti áfangastaðurinn en Bale er fæddur í Cardiff í Wales. Það er þó ansi ólíklegt að leikmaðurinn vilji spila í næst efstu deild á Englandi næsta vetur.
Veðbankar telja einnig líklegt að Bale gæti farið aftur til Tottenham en stjóri liðsins, Nuno Espirito Santo, staðfesti í vikunni að Bale yrði ekki áfram hjá þeim.