Manchester City er að gefast upp á því að reyna að landa Harry Kane frá Tottenham. Þess í stað ætlar félagið að snúa sér að Robert Lewandowski, framherja Bayern Munchen. Þetta kemur fram í frétt Daily Mail í morgun.
Kane hefur verið sterklega orðaður við Manchester City í sumar. Þá er talið að leikmaðurinn sjálfur vilji yfirgefa Tottenham. Daniel Levy, formaður félagsins, hefur hins vegar staðið fastur á því að Kane verði ekki seldur í sumar.
Því ætlar Man City nú að athuga stöðuna á hinum 32 ára gamla Robert Lewandowski.
Pólverjinn hefur átt ótrúleg ár með Bayern frá því hann kom til félagsins árið 2014. Hann hefur skorað 203 mörk í 219 leikjum fyrir félagið.
Lewandowski á tvö ár eftir af samningi sínum við Bayern. Endursemji hann ekki við félagið í sumar gæti það freistast til að selja hann. Það er vegna þess að næsta sumar, þegar leikmaðurinn mun aðeins eiga eitt ár eftir af samningi sínum, snarlækkar verðið á honum.
Lewandowski hefur einnig verið orðaður við Real Madrid í fjölda ára.