Mikkel Qvist snýr aftur til liðs við KA en knattspyrnudeild KA og Horsens hafa náð saman um lánsamning út núverandi leiktíð.
Mikkel sem vakti verðskuldaða athygli með KA liðinu á síðustu leiktíð en hann lék alls 17 leiki í deild og bikar og gerði í þeim eitt mark. Þá hefur hann leikið 81 leik fyrir Horsens í efstu deild og dönsku bikarkeppninni. Á síðasta tímabili spilaði Mikkel á láni hjá HB Køge í dönsku b-deildinni.
„Í kjölfar sölunnar á Brynjar Inga Bjarnasyni til Lecce var ljóst að KA þyrfti að bregðast við og það er frábært að fá Mikkel aftur til liðs við okkur,“ segir á vef KA:
Mikkel sem er stór og stæðilegur, en hann er 26 ára gamall varnarmaður, er 203 cm á hæð. Hann er fastur fyrir og öflugur í loftinu auk þess sem hann er líkamlega sterkur og getur kastað boltanum ansi langt í innköstum.
„KA liðið hefur farið vel af stað í sumar og afar mikilvægt að fá leikmann eins og Mikkel inn á þessum tímapunkti sem þekkir hópinn sem og félagið vel. Auk þess að vera öflugur innan vallar þá er Mikkel frábær persóna utan hans og smellpassar í okkar flotta lið. Bjóðum hann hjartanlega velkominn aftur í KA;“ segir einnig á vef KA.