FH og KA mættust í skemmtilegum leik í 10. umferð Pepsi Max-deildar karla í dag. Jafntefli varð niðurstaðan.
FH fékk víti eftir 20 mínútna leik þegar Brynjar Ingi Bjarnason braut á Birni Daníel Sverrissyni innan teigs. Steven Lennon fór á punktinn og skoraði. Staðan í hálfleik var 1-0.
Dusan Brkovic, varnarmaður KA, fékk rautt spjald um miðjan seinni hálfleik fyrir að brjóta á Ágústi Eðvald Hlynssyni sem aftasti maður.
Þrátt fyrir þetta tókst KA að jafna á 75. mínútu. Þá skoraði Jonathan Hendrickx gegn sínum gömlu félögum eftir sendingu frá Ásgeiri Sigurgeirssyni.
Hvorugu liðinu tókst að finna sigurmark. Lokatölur í Kaplakrika 1-1.
KA er í þriðja sæti deildarinnar með 17 stig eftir níu leiki. Þeir eru 6 stigum á eftir toppliði Vals og eiga leik til góða.
FH er í sjötta sæti með 12 stig eftir tíu leiki.