Þóroddur Hjaltalín, formaður dómaranefndar KSÍ staðfestir við Fréttablaðið að eiginkona dómara hafi fengið hótun eftir leik á Akureyri fyrr í sumar.
Það vakti óhug margra þegar yfirlýsing frá Knattspyrnusambandi Íslands barst í vikunni þess efnis að ítrekaðar hótanir í garð knattspyrnudómara væru hér á landi. Einnig kom fram að fjölskyldur dómara hafi fengið sendar hótanir eftir leiki og vakti sú staðreynd óhug hjá mörgum.
„Þannig séu dæmi þess að dómarar séu eltir inn í búningsklefa í lok leikja og enn fremur að makar og fjölskyldumeðlimir verði fyrir aðkasti löngu eftir að leikjum lýkar þar sem dómarinn var við störf. Eitt slíkt dæmi átti sér stað á Akureyri fyrr í sumar þar sem áhorfandi hringdi í eiginkonu dómarans klukkustund eftir að leik lauk og hafði í hótunum við hana,“ segir í grein eftir Hjörvar Ólafsson á Fréttablaðinu.
Þóroddur segir málið alvarlegt. „Dómarar vita það mæta vel inn í hvaða umhverfi þeir eru að ganga, það er að þeir verði að þola það að kallað sé á þá úr stúkunni og að þátttakendur leiksins séu mis ánægðir með þeirra störf. Það hefur hins vegar borið á því í sumar að of langt sé gengið og því fannst KSÍ nauðsynlegt að bregðast við því,“ segir Þóroddur í samtali við Fréttablaðið.
„Það er allt of algengt að dómarar gefi skýrslu eftir leiki sem þeir dæma þar sem fram kemur að aðstaðan hafi verið óboðleg, starfsmenn félaganna hafi sýnt þeim dónaskap og svo var atvik fyrr í sumar var eiginlega kornið sem fyllti mælinn. Þar hefur áhorfandi fyrir því að leita uppi eiginkonu dómarans til þess að hafa í hótunum við hana.“