Allt tal um að FH ætli sér að rifta samningi við Björn Daníel Sverrisson og að hann hafi neitað að koma inn sem varamaður gegn Breiðabliki eru bull og vitleysa. Þetta segir Davíð Þór Viðarsson, aðstoðarþjálfari FH í samtali við 433.is í dag.
Mikið hefur verið rætt og ritað um Björn Daníel eftir 4-0 tap FH gegn Blikum á sunnudag. Í kjölfarið var Logi Ólafsson látin taka poka sinn sem þjálfari liðsins og Ólafur Jóhannesson ráðinn í hans stað.
Í frétt sem Fótbolti.net birtir í dag segir meðal annars. „Björn Daníel átti að koma inn sem varamaður í stöðunni 4-0 fyrir Breiðablik. Davíð Þór Viðarsson, aðstoðarþjálfari FH, reiddist og skipaði Birni að setjast á bekkinn.“
Davíð Þór segir að þeir hafi vissulega átt í orðaskiptum á hliðarlínunni en Björn hafi aldrei neitað því að mæta inn á völlinn. „Það sem gerðist í þessu atviki, það var tæklað strax daginn eftir,“ sagði Davíð Þór í samtali við 433.is og ítrekað að Björn hafi aldrei neitað því að fara inn á völlinn.
„Það verða ekki frekar eftirmálar af þessu máli og allt tal um riftun er bara bull. Það var ekkert sem gerðist þarna sem gefur tilefni til þess að rifta samningi.“
Björn Daníel hefur verið á varamannabekk stærstan hluta sumars og hafði komið við sögu í sex leikjum fram að leiknum við Blika. FH mætir Njarðvík í bikarnum í dag þar sem Björn Daníel gæti byrjað sinn fyrsta leik í sumar.